Ameer Raza Mazhari
hai muamma miri mohabbat bhi
shukr ke saath hai shikayat bhi
dil ko pyari hai jis ki nafrat bhi
kya ho gar vo kare mohabbat bhi
dushman-e-e’tibar hoti hai
ba.az halat men haqiqat bhi
isi mamure men bana li hai
sada-lauhon ne apni jannat bhi
is mohabbat pe naaz kya kiije
ho mili jis men kuchh muravvat bhi
aag dil ki kisi tarah na bujhi
pi ke dekhi mai-e-mohabbat bhi
tere kuche men jaa.en kis munh se
kho chuke ham tiri amanat bhi
ho basarat se kya umiid ‘raza’
dhoke deti hai jab basirat bhi
Leave a Reply