umr bhar is ko rahi ik sargirani aur bas
vo to kahiye thi hamari saḳht-jani aur bas
ek musht-e-ḳhak bil-aḳhir jo ḳhakistar hui
so ma.al-e-zindagi hai ra.egani aur bas
ik dayar-e-be-aman ki kaj-ada.i dam-ba-dam
ik shab-e-hijran ki paiham nauha-ḳhvani aur bas
mah-o-anjum husn-e-parvaz-e-taḳhayyul ke liye
rahguzar ki dhuul manzil ki nishani aur bas
ashiqi ke baab men daman-darida hi rahe
ik nazar bas ik tabassum kul kahani aur bas
raqs men hain vahshaten qarya-ba-qarya ku-ba-ku
ye junun-e-ishq ki resha-davani aur bas
tha shaikast-e-shauq ka unvan ishq-e-avvalin
pesh-e-pa uftada mera ishq-e-sani aur bas
zindagi ka isti.ara hai dil-e-shorida-sar
hai ragon men ishq ki atish-fishani aur bas
dil sahifa naqsh se arasta us ke raha
dil sahife men likhi is ki kahani aur bas
dard ka darman suḳhan-ha-e-shagufta bhi nahin
be-asar hai sab tiri jadu-bayani aur bas
hai shab-e-hijran tilism-e-tirgi ‘anjum’ daraz
chashm-e-girya ki hai ḳhunaba-fishani aur bas
Leave a Reply