dekha kisi ka ham ne na aisa suna dimagh
in sang-dil buton ka hai allah kya dimagh
karta nahin tamiz sharif-o-razil men
is charkh-e-pir ka hai magar phir gaya dimagh
dekhe bahut hain ham ne hasinan-e-pur-ghurur
lekin ajab tarah ka hai kuchh aap ka dimagh
kal jitna ham ne us ko mana ke banaya tha
utna hi aaj aur hai bigda hua dimagh
jab honge pesh davar-e-mahshar ke samne
ham dekh lenge aap ka roz-e-jaza dimagh
aaya nahin samajh men ye ulta moamla
ban ban ke kyuun bigadta hai ye aap ka dimagh
gul ki bahar gulistan men chand rose hai
achchha nahin hai is qadar ai mah-laqa dimagh
ai ‘mashriqi’ kabhi tha dimagh apna arsh par
hai aj-kal to khaak men apna mila dimagh
Leave a Reply