Mohsin Naqvi
ab vo tufan hai na vo shor havaon jaisa
dil ka aalam hai tire ba.ad ḳhalaon jaisa
kaash duniya mire ehsas ko vapas kar de
ḳhamushi ka vahi andaz sadaon jaisa
paas rah kar bhi hamesha vo bahut duur mila
us ka andaz-e-taghaful tha ḳhudaon jaisa
kitni shiddat se baharon ko tha ehsas-e-ma.al
phuul khil kar bhi raha zard ḳhizaon jaisa
kya qayamat hai ki duniya use sardar kahe
jis ka andaz-e-suḳhan bhi ho gadaon jaisa
phir tiri yaad ke mausam ne jaga.e mahshar
phir mire dil men uTha shor havaon jaisa
barha ḳhvab men pa kar mujhe pyasa ‘mohsin’
us ki zulfon ne kiya raqs ghaTaon jaisa
Leave a Reply