Na Pahunch Saka Zamana Mere Haal Tak Na Pahunche

Mustafa Rahi

na pahunch saka zamana mire haal tak na pahunche

main vahan huun jada-paima ki ḳhayal tak na pahunche

jinhen tujh ko dekhna ho vo miri nazar se dekhen

ḳhad-o-ḳhal men jo uljhe vo jamal tak na pahunche

mira intizar-e-va.ada tira e’tibar-e-farda

shab-o-roz rafta rafta mah-o-sal tak na pahunche

jinhen teri aarzu thi jinhen teri justuju thi

kisi daam men na aa.e kisi jaal tak na pahunche

mire dil ki dhaḌkanon men hain inhin ki ahaTen si

mujhe jin se ye gila tha mire haal tak na pahunche

mire roz-o-shab ka aalam na samajh sakenge ‘rahi’

jo zaval se na guzre jo kamal tak na pahunche