Rahat Hasan
rabt men pahlu-e-nairang kahan se aaya
sahab-e-arz ko ye Dhang kahan se aaya
ḳhushnuma aks hue ḳhaar ki surat kaise
aa.ine sab the to phir sang kahan se aaya
gard ki zad men hai ḳhushbu se mahakta angan
ḳhvab men dahr ka ahang kahan se aaya
sabz hai vadi-e-be-ab men gulshan mera
shab ki tasvir men ye rang kahan se aaya
dost dushman hain sabhi vaz.a pe qaa.em ‘rahat’
kya kahun jiit ke main jang kahan se aaya
Leave a Reply