diyon se aag jo lagti rahi makanon ko
mah o nujum jala den na asmanon ko
mire qabile men kya shahr bhar se mil dekho
koi bhi tiir nahin deta be-kamanon ko
shikastagi ne gira diin saron pe divaren
muḳhasimat thi makinon se kya makanon ko
ye sochta huun vo kya husn-kar tesha tha
jo aaise naqsh ata kar gaya chaTanon ko
yahi karegi kisi samt ka ta.ayyun bhi
isi hava ne to khola hai badbanon ko
jahan ziden kiya karta tha bachpana mera
kahan se la.un khilaunon ki un dukanon ko
Leave a Reply