kab ik maqam pe rukti hai sar-phiri hai hava
tamam shahr o bayaban ko chhanti hai hava
nasib-e-pa-e-junun hai sada ki dar-badri
hava-e-jada-o-manzil men kab chali hai hava
ye pech-o-tab hai kaisa sabab nahin khulta
bana bana ke bagule bigadti hai hava
sivae khaak na kuchh haath aaj tak aaya
sarab ret se sahra men chhanti hai hava
ghazab ka ghaiz o ghazab tha jo ham na bikhre the
bikhar gae hain to kaisi dari khadi hai hava
ukhad tod ke basti ke sab makanon ko
chhipi khandar men pashiman ro rahi hai hava
vo ek baat jo khud se bhi ham na kahte the
zaban zaban pe vahi baat dhar gai hai hava
tamam laala o gul ke charagh raushan hain
shajar shajar pe shagufon men jal rahi hai hava
kab apna haath pahunchta gulab tak ‘bilqis’
mire nasib se shakhon men ja phansi hai hava
Leave a Reply