ham loTte haiñ vo so rahe haiñ
kyā nāz-o-niyāz ho rahe haiñ
kyā rañg jahāñ meñ ho rahe haiñ
do hañste haiñ chaar ro rahe haiñ
duniyā se alag jo ho rahe haiñ
takiyoñ meñ maze se so rahe haiñ
pahuñchī hai hamārī ab ye hālat
jo hañste the vo bhī ro rahe haiñ
tanhā tah-e-ḳhāk bhī nahīñ ham
hasrat ke saath so rahe haiñ
sote haiñ lahad meñ sone vaale
jo jāgte haiñ vo ro rahe haiñ
arbāb-e-kamāl chal base sab
sau meñ kahīñ ek do rahe haiñ
palkoñ kī jhapak dikhā ke ye but
dil meñ nashtar chubho rahe haiñ
mujh dāġh-nasīb kī lahad par
laale kā vo biij bo rahe haiñ
piirī meñ bhī ham hazār afsos
bachpan kī niiñd sau rahe haiñ
dāman se ham apne dāġh-e-hastī
āb-e-ḳhanjar se do rahe haiñ
meñ jaag rahā huuñ a shab-e-ġham
par mere nasīb sau rahe haiñ
ro.eñge hameñ rulāne vaale
Dūbeñge vo jo Dubo rahe haiñ
ai hashr madīne meñ na kar shor
chup chup sarkār sau rahe haiñ
ā.īne pe bhī kaḌī nigāheñ
kis par ye itaab ho rahe haiñ
bhārī hai jo motiyoñ kā maalā
aaTh aaTh aañsū vo ro rahe haiñ
dil chhīn ke ho ga.e haiñ ġhāfil
fitne vo jagā ke sau rahe haiñ
hai ġhair ke ghar jo in kī dāvat
ham jaan se haath dho rahe haiñ
sad shukr ḳhayāl hai usī kā
ham jis se lipaT ke sau rahe haiñ
ho jaa.eñ na ḳhushk daaġh ke phuul
aañsū un ko bhigo rahe haiñ
aa.egī na phir ke umr-e-rafta
ham muft meñ jaan kho rahe haiñ
kyā girya-e-be-asar se hāsil
is rone pe ham to ro rahe haiñ
fariyād ki nāḳhudā-e-kashtī
kashtī ko mirī Dubo rahe haiñ
kyoñ karte haiñ ġham-gusār taklīf
aañsū mire muñh ko dho rahe haiñ
mahfil barḳhāst hai patañge
ruḳhsat sham.oñ se ho rahe haiñ
hai coach kā vaqt āsmāñ par
taare kahīñ naam ko rahe haiñ
un kī bhī numūd hai koī dam
vo bhī na raheñge jo rahe haiñ
duniyā kā ye rañg aur ham ko
kuchh hosh nahīñ hai so rahe haiñ
Thahro dam-e-naza.a do ghaḌī aur
do chaar nafas hī to rahe haiñ
phuul un ko pinhā pinhā ke aġhyār
kāñTe mire haq meñ bo rahe haiñ
zaanū pe ‘amīr’ sar ko rakkhe
pahroñ guzre ki ro rahe haiñ