ham loTte hain vo so rahe hain
kya naz-o-niyaz ho rahe hain
kya rang jahan men ho rahe hain
do hanste hain chaar ro rahe hain
duniya se alag jo ho rahe hain
takiyon men maze se so rahe hain
pahunchi hai hamari ab ye halat
jo hanste the vo bhi ro rahe hain
tanha tah-e-ḳhak bhi nahin ham
hasrat ke saath so rahe hain
sote hain lahad men sone vaale
jo jagte hain vo ro rahe hain
arbab-e-kamal chal base sab
sau men kahin ek do rahe hain
palkon ki jhapak dikha ke ye but
dil men nashtar chubho rahe hain
mujh dagh-nasib ki lahad par
laale ka vo biij bo rahe hain
piiri men bhi ham hazar afsos
bachpan ki niind sau rahe hain
daman se ham apne dagh-e-hasti
ab-e-ḳhanjar se do rahe hain
men jaag raha huun a shab-e-gham
par mere nasib sau rahe hain
ro.enge hamen rulane vaale
Dubenge vo jo Dubo rahe hain
ai hashr madine men na kar shor
chup chup sarkar sau rahe hain
a.ine pe bhi kaḌi nigahen
kis par ye itaab ho rahe hain
bhari hai jo motiyon ka maala
aaTh aaTh aansu vo ro rahe hain
dil chhin ke ho ga.e hain ghafil
fitne vo jaga ke sau rahe hain
hai ghair ke ghar jo in ki davat
ham jaan se haath dho rahe hain
sad shukr ḳhayal hai usi ka
ham jis se lipaT ke sau rahe hain
ho jaa.en na ḳhushk daagh ke phuul
aansu un ko bhigo rahe hain
aa.egi na phir ke umr-e-rafta
ham muft men jaan kho rahe hain
kya girya-e-be-asar se hasil
is rone pe ham to ro rahe hain
fariyad ki naḳhuda-e-kashti
kashti ko miri Dubo rahe hain
kyon karte hain gham-gusar taklif
aansu mire munh ko dho rahe hain
mahfil barḳhast hai patange
ruḳhsat sham.on se ho rahe hain
hai coach ka vaqt asman par
taare kahin naam ko rahe hain
un ki bhi numud hai koi dam
vo bhi na rahenge jo rahe hain
duniya ka ye rang aur ham ko
kuchh hosh nahin hai so rahe hain
Thahro dam-e-naza.a do ghaḌi aur
do chaar nafas hi to rahe hain
phuul un ko pinha pinha ke aghyar
kanTe mire haq men bo rahe hain
zaanu pe ‘amir’ sar ko rakkhe
pahron guzre ki ro rahe hain
Leave a Reply