siyah-ḳhana-e-jan men sharar-e-shauq ki hai
ye tazgi ye damak nau-bahar shauq ki hai
tamam zabza-o-divar zard hai phir bhi
dabi dabi si sada abshar-e-shauq ki hai
yahi badan se badan ka hai valihana kalam
miri ragon men jo masti ḳhumar-e-shauq ki hai
na tund-o-tez hava hai na mauj-e-tufan-ḳhez
yahi to umr miyan karobar-e-shauq ki hai
hai didani dar-o-divar aarzu ki chamak
ajiib raushni sham-e-mazar-e-shauq ki hai
nigah-e-naz fusun-afrin ko hai ma.alum
ki nok TuuTi hui dil men ḳhar-e-shauq ki hai
yahi hai nuqta-e-aghaz shahr-e-gul ‘ishrat’
isi dayar men ḳhushbu dayar-e-shauq ki hai
Leave a Reply