aa.ine meñ pas-e-manzar kā ubharnā kaisā
jhiil jaisī tirī āñkhoñ meñ ye jharnā kaisā
umr-bhar saath raho to kahīñ mahke āñgan
kisī ḳhushbū kī tarah chhū ke guzarnā kaisā
vo to ik ḳhvāhish-e-nākām thī jo chīḳh paḌī
be-sabab apnī hī āvāz se Darnā kaisā
gard shīshoñ se haTāo to koī baat bane
andhe ā.īnoñ ke aage ye sañvarnā kaisā
pheñk do bār-e-alam kuchh to safar āsāñ ho
bojh laade hue duniyā se guzarnā kaisā
ai mire shor-e-nafas bār-e-samā.at se gurez
niiñd ke vaqt sadāoñ kā ubharnā kaisā
gosh-e-ummīd hue jabki sadāoñ ke asiir
fat.h phir koh-e-nidā kā ‘ziyā’ karnā kaisā