aa.ine men pas-e-manzar ka ubharna kaisa
jhiil jaisi tiri ankhon men ye jharna kaisa
umr-bhar saath raho to kahin mahke angan
kisi ḳhushbu ki tarah chhu ke guzarna kaisa
vo to ik ḳhvahish-e-nakam thi jo chiḳh paḌi
be-sabab apni hi avaz se Darna kaisa
gard shishon se haTao to koi baat bane
andhe a.inon ke aage ye sanvarna kaisa
phenk do bar-e-alam kuchh to safar asan ho
bojh laade hue duniya se guzarna kaisa
ai mire shor-e-nafas bar-e-sama.at se gurez
niind ke vaqt sadaon ka ubharna kaisa
gosh-e-ummid hue jabki sadaon ke asiir
fat.h phir koh-e-nida ka ‘ziya’ karna kaisa
Leave a Reply