Mirza Ghalib
bisat-e-ijz men tha ek dil yak qatra khuun vo bhi
so rahta hai ba-andaz-e-chakidan sar-nigun vo bhi
rahe us shokh se azurda ham chande takalluf se
takalluf bartaraf tha ek andaz-e-junun vo bhi
khayal-e-marg kab taskin dil-e-azurda ko bakhshe
mire dam-e-tamanna men hai ik said-e-zabun vo bhi
na karta kaash naala mujh ko kya malum tha hamdam
ki hoga bais-e-afzaish-e-dard-e-darun vo bhi
na itna burrish-e-tegh-e-jafa par naaz farmao
mire dariya-e-be-tabi men hai ik mauj-e-khun vo bhi
mai-e-ishrat ki khvahish saqi-e-gardun se kya kiije
liye baitha hai ik do chaar jam-e-vazh-gun vo bhi
mire dil men hai ‘ghalib’ shauq-e-vasl o shikva-e-hijran
khuda vo din kare jo us se main ye bhi kahun vo bhi
mujhe maalum hai jo tu ne mere haq men socha hai
kahin ho jaae jald ai gardish-e-gardun-e-dun vo bhi
nazar rahat pe meri kar na vaada shab ke aane ka
ki meri khvab-bandi ke liye hoga fusun vo bhi
Leave a Reply