juda karenge na ham dil se hasrat-e-dil ko
aziiz kyuun na rakhen zindagi ke hasil ko
nihan agarche hai mahfil se soz-e-dil mera
magar ye raaz hai ma.alum sham-e-mahfil ko
vo tuul khincha bala ka tire taghaful ne
ki sabr aa hi gaya mere muztarib dil ko
kaThin hai kaam to himmat se kaam le ai dil
bigaḌ kaam na mushkil samajh ke mushkil ko
vo kaam mera nahin jis ka nek ho anjam
vo raah meri nahin jo ga.i ho manzil ko
ḳhabar hui na unhen mere muztarib dil ki
ghalat ḳhayal hai ye dil se raah hai dil ko
bala ki hoti hai ‘vahshat’ ki bhi ghazal-ḳhvani
ki ik surur sa hota hai ahl-e-mahfil ko
Leave a Reply