hijr-zada a.ankhon se jab aansu nikle ḳhamoshi se
kisi ne samjha raat samay do diip jale ḳhamoshi se
main bhi aag laga sakta huun is barsat ke mausam men
thoḌi duur talak vo mere saath chale ḳhamoshi se
shaam ki dhimi aanch men jab ḳhurshid naha kar so jaa.e
manzar aapas men milte hain ḳhuub gale ḳhamoshi se
barf ki parten jab bhi dekhun main unchi divaron par
jism sulagne lagta hai aur dil pighle ḳhamoshi se
chahat ke phir phuul khilenge aap ki ye ḳhush-fahmi hai
kapḌe mere samne mausam ne badle ḳhamoshi se
din ke ujalon men shayad main ḳhud se bichhḌa rahta huun
raat ki tariki men ik ḳhvahish machle ḳhamoshi se
jab bhi nadida sapnon ne man angan men raqs kiya
teri yaad ke jugnu chamke raat Dhale ḳhamoshi se
mulk-e-suḳhan ke shahzadon ki saf men khaḌa ho ja.ega
gar tire lahje ki dhaḌkan ḳhushbu ugle ḳhamoshi se
Leave a Reply