vo pahle fikr ko harf-e-kamal deta hai
phir agahi se sukhan ko ujaal deta hai
mujhi ko log bahut sakht-jan samajhte hain
mujhi pe har koi patthar uchhal deta hai
vo aks ban ke utarta hai jab bhi ankhon men
tamam aaine dil ke ujaal deta hai
mohabbaton ka use meri e’tibar nahin
magar raqibon ko meri misal deta hai
kisi ko phuul se lagte hain ishq men patthar
kisi ko tesha bhi shauq-e-visal deta hai
‘sukhan’ hayat men kuchh aise mod aate hain
har ek lamha khushi ka malal deta hai
Leave a Reply