Qayyum Nazar
ser-shikami ka bhuuk se hai milap
ruuh ki tishnagi sambhaliye aap
raqs-farma hui vo sim-tani
be-zari ki bahar ne di thaap
shahar vaale hain kholta laava
gali-kuchon se uTh rahi hai bhaap
na-muradi ke baḌhte silsile ko
na.e paimana-e-sitam se naap
is ko namrud ka taqaza jaan
atish-e-husn ko na baiTh ke taap
ḳhamushi to ilaj-e-dard nahin
baat banti nahin hai aap se aap
tu bhi kah de jo tere ji men hai
sun raha huun main har anap-shanap
koi aaya na gosha-e-dil tak
shah-rah par suni thi paanv ki chaap
yuun hi shayad mizaj badle tira
mere ash.ar apne naam se chhap
vaqt, mausam ‘nazar’ nigah men rakh
kis ne tujh se kaha ye raag alaap
Leave a Reply