Dattatriya Kaifi
maqsad hasil nahin ho ya ho
jo hona hai jald ai ḳhuda ho
ulfat hai pas-e-vaz.a ka naam
marte mar jaao par nibaho
dil men nahin ḳhuub mail rakhna
jo shikva gila ho barmala ho
kya hota hai farsh boriya se
lazim hai ki qalb be-riya ho
ik jaam hi to pila de lillah
ai pir-e-mughan tera bhala ho
darkar use madad hai kis ki
jis ko allah ka aasra ho
us dil ki jalan jo dekh paa.e
sham-e-sozan charagh-pa ho
kya aur bhala kahun main tum ko
tum hazrat-e-ishq bad-bala ho
kahne ko to kah ga.e ho sab kuchh
ab koi javab de to kya ho
dil ziist se sard ho gaya hai
ai soz-e-jigar tira bura ho
be-aib koi nahin hai ‘kaifi’
gar ho to vo zat-e-kibriya ho
Leave a Reply