tez ho jaata hai ḳhushbu ka safar shaam ke baad
phuul shahron men bhi khilte hain magar shaam ke baad
us se daryaft na karna kabhi din ke halat
sub.h ka bhula jo lauT aaya ho ghar shaam ke baad
din tire hijr men kaT jaata hai jaise-taise
mujh se rahti hai ḳhafa meri nazar shaam ke baad
qad se baḌh jaa.e jo saaya to bura lagta hai
apna suraj vo uTha leta hai har shaam ke baad
tum na kar paoge andaza tabahi ka miri
tum ne dekha hi nahin koi shajar shaam ke baad
mere baare men koi kuchh bhi kahe sab manzur
mujh ko rahti hi nahin apni ḳhabar shaam ke baad
yahi milne ka samay bhi hai bichhaḌne ka bhi
mujh ko lagta hai bahut apne se Dar shaam ke baad
tirgi ho to vajud us ka chamakta hai bahut
DhunD to lunga use ‘nur’ magar shaam ke baad
Leave a Reply