zindagi uljhi hai bikhre hue gesu ki tarah
gham piye jaate hain umDe hue aansu ki tarah
aaj vahshat ka ye aalam hai ki har insan hai
dasht-e-tajrid ke bhage hue aahu ki tarah
zulm ka aag ugalta hua suraj sar par
tapish-e-dard se har saans hai ab lu ki tarah
hai gulistan men tiri gul-badani ka shohra
kaash tu guzre idhar se kabhi ḳhushbu ki tarah
assi ummid pe a.ina-e-dil dhote hain
mun.akis ho koi surat mire mah-ru ki tarah
shab-e-furqat men bhi tanha.i mayassar na hui
laakh gham ghere rahe mujh ko jafa-ju ki tarah
be-dili shart-e-mulaqat hai to yuun hi sahi
ham tire shahr men ab a.enge sadhu ki tarah
Dubne lagti hai jab rang ke sailab men aankh
yaad tab us ki bacha leti hai jaadu ki tarah
sarzanish bhi tiri banti hai sahara mera
rah-e-dushvar men phaile hue baazu ki tarah
lazzat-e-dahr men gum hota hai jab dil ‘asra’
tab kasak uThta hai vo dard ke pahlu ki tarah
Leave a Reply