Abdul Rahman Khan Wasfi Bahraichi
koi nazr-e-gham-e-halat na hone paae
aur har baat ho ye baat na hone paae
jo bhi surat hai inayat hai karam hai un ka
raegan un ki ye saughat na hone paae
un ki tasvir se har lamha rahe raz-o-niyaz
muntashir shan-e-khayalat na hone paae
sakht dushvar hai pabandi-e-ain-e-vafa
baat to jab hai tujhe maat na hone paae
jaan de dijiye adab-e-mohabbat ke liye
dekhiye khami-e-jazbat na hone paae
bazm men un ka koi zikr jo aa jaata hai
hukm hota hai miri baat na hone paae
husn-e-kirdar se hasti ko saja lo ‘vasfi’
zindagi nazr-e-khurafat na hone paae
Leave a Reply