maryam-naz

Na Pure Hue Ba-Khuda Bechte Hain

na puure hue ba-khuda bechte hain

yuun khvab-o-khayalon ko ja bechte hain

nahin koi mukhlis zamane men varna

ata bechte the rida bechte hain

tabibon ki saari hai apni kahani

vafa bechte hain shifa bechte hain

chalo tum bhi ham se ye vaada karo ab

qasam kha ke saari ana bechte hain

ye ahl-e-zamana kahan jante hain

dilon men sulagti sada bechte hain

hue hain vo ham se parae ki aise

laga ke gira phir qaba bechte hain

sitam pe sitam vo kiye ja rahe hain

laga ke vo zakhm ab dava bechte hain

nahin hoti un se koi baat bhi to

ye ankhon ke andhe dua bechte hain

bhare mal-o-daulat se kamre hain khali

havas ke pujari kala bechte hain

mukammal ho tera funun-e-safar ye

haan saghar se kah do dua bechte hain

jo dekha andhera to rahon men ‘mariyam’

amavas ki shab men ziya bechte hain

More Poems

Leave a Comment