Dattatriya Kaifi
saqiya kis ko havas hai ki piyo aur pilao
ab vo dil hi na raha aur umangen na vo chaav
rahne de zikr ḳham-e-zulf-e-musalsal ko nadim
us ke to dhyan se bhi hota hai dil ko uljhao
kucha-e-ishq men jaana na kabhi bhuul ke tum
hai vahan ab-e-dam-e-tegh ka har ja chhiḌkav
kya zarurat ki hasinon ke dahan ki ḳhatir
tum kamar bandh ke mulk-e-adamistan tak jaao
kyuun miTo naqsh-e-qadam saan kisi raftar pe tum
baiThe biThla.e gharaz kya hai ki ik hashr uThao
kis tarah koi unhen raah pe laa.e yarab
aur bargashta hue jaate hain jitna samjhao
na-ḳhuda ban ke ḳhuda paar kar is ka beḌa
be-tarah phans ga.i hai hind ki manjdhar men naav
ye nahin hai ki nahin qabiliyyat kuchh un men
himmaten harne ka ho gaya kuchh un ka subhav
gharb hai mashriq-e-ḳhurshed-e-ulum-o-hikmat
ab ye lazim hai ki lau apni udhar ko hi lagao
jo qadamat pe uḌe baiThe hain vo hain gumrah
un se bachna hain ghazab un ke utaar aur chaḌhao
asia ke to tumhen naam se kahna hi nahin
vahi surat hai use kitna hi ulTo palTao
rasm-o-maz.hab se na tum ghair bano aapas men
ho chalat men koi ya Thaah men sam par mal jaao
bas karo rahne bhi do vaz-o-nasihat ‘kaifi’
nasehon ko to yahan paḌti hain bazar ke bhaav
Leave a Reply