pichhle zaḳhmon ka izala na hi vahshat karega
tujh se vaqif huun miri jaan tu mohabbat karega
main chala ja.unga duniya se sikandar ki tarah
agli sadiyon pe tira naam hukumat karega
pesh hai dusre aalam men bhi tanha rahna
main ne socha tha tu duniya se baghavat karega
dil tiri rah-e-aziyyat se palaTne ko hai
kya tu ab bhi na mira ḳhvab haqiqat karega
tu miri maut ki tasdiq nahin kar sakta
chhuega to mujhe aur dil mira harakat karega
vahima sahra-navardi ka mudallal nahin hai
koi hoga mire dil men tabhi hijrat karega
vo jo ‘afaq’ charaghon ki laven toḌta hai
apna suraj bhi usi haath pe bai.at karega
Leave a Reply