Sazishon Ki bhiD Mein Tarikiyan Sar Par uThae

P P Srivastava Rind

sazishon ki bhiiḌ men tarikiyan sar par uTha.e

baḌh rahe hain shaam ke saa.e dhuan sar par uTha.e

reg-zaron men bhaTakti soch ke kuchh ḳhushk lamhe

talḳhi-e-halat ki hain dastan sar par uTha.e

ḳhvahishon ki aanch men tapte badan ki lazzaten hain

aur vahshi raat hai gumrahiyan sar par uTha.e

chand gungi dastaken hain ghar ke darvaze ke bahar

chiḳh sannaTon ki hai saara makan sar par uTha.e

zehn men Thahri hui hai ek andhi muddaton se

ham magar phirte rahe reg-e-ravan sar par uTha.e

alam-e-la-varsi men jaane kab se dar-ba-dar huun

pusht par maazi ko laade qarz-e-jan sar par uTha.e

muztarib si ruuh hai meri bhaTakta phir raha huun

main ka.i janmon se huun bar-e-giran sar par uTha.e

‘rind’ jab be-samtiyon men ḳhushk patte uḌ rahe hon

tohmaten kis ke liye sham-e-ḳhizan sar par uTha.e