Bas Ek Rasta Hai Ek Aawaz Aur Ek Saya Hai

bas ik rasta hai ik avaz aur ek saaya hai

ye kis ne aa ke gahri niind se mujh ko jagaya hai

bichhadti aur milti saaton ke darmiyan ik pal

yahi ik pal bachane ke liye sab kuchh ganvaya hai

idhar ye dil abhi tak hai asir-e-vahshat-e-sahra

udhar us aankh ne charon taraf pahra bithaya hai

tumhen kaise bataen jhuut kya hai aur sach kya hai

na tum ne aaina dekha na aina dikhaya hai

hamen ik ism-e-azam yaad hai vo saath hai, ham ne

kai baar asman ko in zaminon par bulaya hai

kahan tak rokte aankhon men abr-o-bad-e-hijran ko

ab aae ho ki jab ye shahr zer-e-ab aaya hai

‘salim’ ab tak kisi ko ba-dua di to nahin lekin

hamesha khush rahe jis ne hamara dil dukhaya hai

Leave a Comment