Arzoo Lakhnavi
aaj be-ap ho ga.e ham bhi
aap ko pa ke kho ga.e ham bhi
daane kam the dukhon ki simran men
thoḌe moti piro ga.e ham bhi
der se the vo jis ke ghere men
usi jhurmuT men kho ga.e ham bhi
ja kai DhunDa kahan kahan na tumhen
jab na paaya to kho ga.e ham bhi
naam jiine ka jagna rakh kar
aaj be niind so ga.e ham bhi
ro.enge gar to jag-hansa.i ho
karte kya chup se ho ga.e ham bhi
haa.e re ‘arzu’ ki be-asi
aap be-bas the ro ga.e ham bhi
Leave a Reply