dilon ke beach badan ki fasil uTha di jaa.e
simaT rahi hai masafat zara baḌha di jaa.e
hamari samt kabhi zahmat-e-safar to karo
tumhari raah men bhi kahkashan bichha di jaa.e
bani to hogi kahin sarhad-e-garan-goshi
tumhin batao kahan se tumhen sada di jaa.e
kisi ke kaam to aa.e ḳhulus ki ḳhushbu
mizaj men na sahi jism men basa di jaa.e
ye sochte nahin kyuun fasle tavil hue
ye puchhte hain ki raftar kyuun baḌha di jaa.e
ye mahviyat na kahin tujh se pher de sab ko
tiri taraf se tavajjoh zara haTa di jaa.e
takallufat ki pur-pech vadiyan kab tak
ba-rah-e-rast unhen davat-e-vafa di jaa.e
suni hain ham ne bahut tirgi pe taqriren
mile na lafz agar raushni bujha di jaa.e
guzarne vaali hava ḳhud pata laga legi
zara si aag kisi raakh men daba di jaa.e
Leave a Reply