ankhon se jab ye ḳhvab sunahre utar ga.e
ham dil men apne aur bhi gahre utar ga.e
sanpon ne man ki biin ko kaaTa hai is tarah
the us ke paas jitne bhi lahre utar ga.e
laa.e hain vo hi aag ke moti baTor kar
jo ansuon ki barf men gahre utar ga.e
logon ke dard-o-gham bhi siyasat ke zehn men
jhanḌon se ek din ko hi phahre utar ga.e
pahre pe sab hi chor hain ye tab pata chala
ankhon se jab ye niind ke pahre utar ga.e
ham jab taTon ke paas rahe Dubte rahe
jab jab bhanvar ke beach men Thahre utar ga.e
na.aron ki siḌhiyon ko laga kar chaḌhe jo log
ho kar unhin ki choT se bahre utar ga.e
jis din se mere dil men ‘kunvar’ bas ga.e hain aap
duniya ke mujh pe jitne the pahre utar ga.e
Leave a Reply