Digar-Gun Hai Jahan Taron Ki Gardish Tez Hai Saqi

digar-gun hai jahan taron ki gardish tez hai saaqi

dil-e-har-zarra men ghaugha-e-rusta-khez hai saaqi

mata-e-din-o-danish lut gai allah-valon ki

ye kis kafir-ada ka ghamza-e-khun-rez hai saaqi

vahi derina bimari vahi na-mohkami dil ki

ilaaj is ka vahi ab-e-nashat-angez hai saaqi

haram ke dil men soz-e-arzu paida nahin hota

ki paidai tiri ab tak hijab-amez hai saaqi

na uttha phir koi ‘rumi’ ajam ke lala-zaron se

vahi ab-o-gil-e-iran vahi tabrez hai saaqi

nahin hai na-umid ‘iqbal’ apni kisht-e-viran se

zara nam ho to ye mitti bahut zarkhez hai saaqi

faqir-e-rah ko bakhshe gae asrar-e-sultani

baha meri nava ki daulat-e-parvez hai saaqi

Leave a Comment