Poet
ajnabiyyat ka har ik ruḳh pe nishan hai yaaro
apne hi shahar men ghurbat ka saman hai yaaro
asmanon men lachakti hui ye qaus-e-quzah
bhes badle hue ravan ki kaman hai yaaro
ik siyasat hai ki hai dair-o-haram ki mahbub
ik mohabbat hai ki rusva-e-jahan hai yaaro
ahl-e-dil rah ga.e asar-e-qadima ho ke
zindagi ek shikasta sa makan hai yaaro
dil hi sha.ista-e-gul-gasht nahin hai varna
ye zamin aaj bhi firdaus-e-javan hai yaaro
Leave a Reply