dard-e-dil zaḳhm-e-jigar ka razdan koi nahin
vaqif-e-asrar-e-gham azar-e-jan koi nahin
paas jis ke kuchh nahin mal-o-mata-e-be-baha
us ko kya gham ki muhafiz pasban koi nahin
kya suluk ham-sa.e ka batla.e ik ḳhana-ba-dosh
be-dar-o-divar sa jis ka makan koi nahin
daad ke laa.eq amir-e-shahr hi ki zaat hai
kyunki ab fōtpath par bhi be-aman koi nahin
ḳhana-e-dil tak mire koi gaya to hai zarur
naqsh pa ka chhoḌa hai lekin nishan koi nahin
roz kuchh aise guzarte is jahan se hain zarur
haa.e jis ka rone vaala nauha-ḳhvan koi nahin
aabru allah ne ‘ḳhushtar’ jabin ki rakkhi hai
jis ka is dar ke siva hai astan koi nahin
Leave a Reply