Hashim Raza Jalalpuri
bahut din tak koi chehra mujhe achchha nahin lagta
mata-e-did pe qabza mujhe achchha nahin lagta
kanizon pe bhi aa sakta hai dil zill-e-ilahi ka
nizam-e-ishq men shajara mujhe achchha nahin lagta
main kuchh bhi soch sakta huun main kuchh bhi dekh sakta huun
ḳhayal-o-ḳhvab pe pahra mujhe achchha nahin lagta
na khiḌki hai na angan hai na roshan-dan hai koi
imarat-saz ye naqsha mujhe achchha nahin lagta
jo hoti haath men mere to duniya baanT deta main
kisi ke haath men kaasa mujhe achchha nahin lagta
Leave a Reply