vo jahan hain vahin ḳhayal mira
mustaqil ho gaya visal mira
pyaar se dekha phir mujhe us ne
phir se ohda hua bahal mira
vo jo pagal tha ab vo kaisa hai
aaise vo puchhta hai haal mira
apni yadon ki raushni kam kar
is ne sona kiya muhal mira
main hi a.unga apne raste men
mere bhitar se Dar nikal mira
saath mere ghasiTta hai pal pal
thak ke saaya hua niDhal mira
is amavas men phir se tanha huun
chand hai gar sharik-e-hal mira
TuTna hai javab men tum ko
aaj kuchh saḳht hai saval mira
taaki tu rah sake ḳhuda mujh men
mujh se aaseb ab nikal mira
aaya pal bhar ko sar pe saaya phir
dhuup ko aa gaya ḳhayal mira
tu mujhe aazma na aur ‘atish’
tera jalna bhi hai kamal mira
Leave a Reply