aankh men dahshat na thi haath men ḳhanjar na tha
samne dushman tha par dil men koi Dar na tha
us se bhi mil kar hamen marne ki hasrat rahi
us ne bhi jaane diya vo bhi sitamgar na tha
ik pahaḌi pe main baiTha raha der tak
shauq se dekha karun aisa bhi manzar na tha
ham se jo aage ga.e kitne mehrban the
duur talak raah men ek bhi patthar na tha
raat bahut der se aankh lagti thi zara
niind men kamra na tha ḳhvab men bistar na tha
sher to ham ne bahut Thiik kiya tha magar
ab bhi ghalat tha kahin ab bhi barabar na tha
socha tha is baar to ja ke ‘zafar’ se milen
kya karen ‘alvi’ magar aisa muqaddar na tha
Leave a Reply