Kya Sath Tera Dun Ki Main Ek Mauj-E-Hawa Hun

Arsh Siddiqui

kya saath tira duun ki main ik mauj-e-hava huun

bas ek nafas arz-e-tamanna ko ruka huun

rahta huun bagulon ki tarah raqs men be-tab

ai ham-nafaso main dil-e-sahra se uTha huun

qatra huun main dariya men mujhe kuchh nahin ma.alum

ham-rah mire kaun hai main kis se juda huun

ik lamha Thahar mujh ko bhi ham-rah liye chal

ai laila-e-hasti tira naqsh-e-kaf-e-pa huun

ai zabt-e-nazar de mire iman ki gavahi

tu hi to samajhta hai ki main kaun huun kya huun

chahe bhi to vo mujh se juda ho nahin sakta

vo hai miri zanjir to main us ki sada huun

main arsh-nashin bhi huun tire ghar ka makin bhi

main nik.hat-e-iman huun main bu-e-vafa huun