vo salmiyyat thi ek vahdat
vo kamiliyyat kisi tarah ek ghair-mazbut saniye men bikhar gai to
alag hua us ka ek hissa!
vo ek unsur ka ek hissa
jhatak ke daman
khala ke gahre amiiq la-vaqt faslon ko ubuur karta
hazaron sadiyon ki duriyon par chala gaya hai…..!
koi nahin janta ke kaise vo na-mukammal shikasta unsur
adhure-pan ki aziyyaton se guzar raha hai
magar vo itna to janta hai
ki jaan se bhi aziz-tar vo adhura unsur
atuut bandhan ki ek Dori se be-lachak sa bandha hua hai!
hava ki Dori ka ik sira us ke haath men hai
to dusra us ke haath men hai
agar ye ranjur ho gaya to
hava ke taron pe dukh ki lahren
vahan pahunch kar
use bhi dukh men lapet lengi!!