Charagh Jab Mera Kamra Napta Hai

charagh ne phuul ko janm dena shurua kar diya hai

duur bahut duur mera janm din rahta hai

angan men dhuup na aae to samho

tum kisi ghair-abad ilaqe men rahte ho

mitti men mere badan ki tut-phut padi hai

hamare khvabon men chaap kaun chhod jaata hai

raat ke sannate men tutte hue charagh

raat ki chadar pe phailti hui subh

main bikhri patiyan uthati huun

tum samundar ke daman men

kisi bhi lahr ko utar jaane do

aur phir jab insanon ka sannata hota hai

hamen marne ki mohlat nahin di jaati

kya khvahish ki miyan men

hamare hausle rakhe hue hote hain

har vafadar lamha hamen chura le jaata hai

raat ka pahla qadam hai

aur main paidal huun

baisakhiyon ka chand banane vaale

mere angan ki chhanv lut chuki

meri ankhen mare hue bachche hain

aur phir meri tut-phut

samundar ki tuut phuut ho jaati hai

main qarib se nikal jaun

koi samt-e-safar ki pahchan nahin kar sakti

shaam ki tuuti munder se

hamare talatum pe

aaj raat ki tartib ho rahi hai

musafir apne sang-e-mil ki hifazat karta hai

charagh kamra napta hai

aur gham mere dil se janm leta hi hai

zamin hairat karti hai

aur ek ped uga deti hai

Leave a Comment