sar-e-varaq pe likha intiqam hai shayad
isi bayaz men mera bhi naam hai shayad
kaha jo main ne ki kuchh ehtijaj hai barpa
to bole zill-e-ilahi avaam hai shayad
uThe jo haath dua ko badal ga.e manzar
ḳhuda se mera yaqin ham-kalam hai shayad
main aa.uun tum ko na dekhun to phir palaT ja.un
tumhari samt se ye intizam hai shayad
ye ab-o-gil ye shajar asman ye suraj
kisi ke aane ka ye ehtimam hai shayad
jami hui hai nazar aaj tum pe saaqi ki
tumhare hisse ka gardish men jaam hai shayad
namaz-e-fazr men masjid men kyuun hai sannaTa
namazi koi nahin bas imaam hai shayad
Leave a Reply