main ne ek sahil se ek siipi uthai
aur apne aansu ko us men band kar ke
duur gahre samundar men phenk diya
main ne apne hathon par
ik tez chhuri se
lambe safar ki lakir banai
aur aise juute kharide
jo chalte hue pairon ko hamesha zakhmi rakhte hain
ab ki dafa main ne ghar banaya hai
aise shishon ka
jin men sirf andar ka aks rahta hai
aur aisi aag ka
jo zarurat padne par khud hi jal uthti hai
aur aisi hava ka
jis ke liye koi darvaza kholne ki zarurat nahin
aur aisi chizon ka
jo apni apni jagah par farsh se judi hui hain
main ne apne mausamon ko chura liya hai
aur ghaas ke maidanon ko
registanon ko asmanon ko
main ne ek titli ko ek kitab men chhupa liya hai
aur ik khvab ko ankhon men
aur mohabbat ko janne ke liye
main ne
ek nazm padhi hai
aur avaz ke liye
ik giit gaaya hai
main ne ghup andhere men
ankhen band kar ke
ghar ke shishon men
khud ko dekha hai
aur yaad kiya hai
ek aadmi ko
jo gahre samundar men
vo siipi dhundne utar gaya
jis men main ne apna aansu qaid kar ke phenka tha
Leave a Reply