dil vahimon ke ḳhvab ke pichhe nahin gaya
sairab tha sarab ke pichhe nahin gaya
be-chehragi aziiz magar ḳhal-o-ḳhad ka gham
dagh-e-jigar naqab ke pichhe nahin gaya
radd-o-qubul men bhi qana.at-pasand tha
husn-e-talab javab ke pichhe nahin gaya
uryan hai bargah-e-tamasha men sar-ba-sar
shauq-e-junun hijab ke pichhe nahin gaya
is baar iḳhtiyar ki asudgi chuni
taara ki mahtab ke pichhe nahin gaya
Leave a Reply