mausam-e-gul men jo ghir ghir ke ghataen aaiin
hosh ud jaate hain jin se vo havaen aaiin
chal base su-e-adam tum ne bulaya jin ko
yaad aai to gharibon ki qazaen aaiin
ruuh taazi hui turbat men vo thandi thandi
bagh-e-firdaus ki har su se havaen aaiin
main vo divana tha jis ke liye bazm-e-gham men
ja-ba-ja bichhne ko pariyon ki ridaen aaiin
munkir-e-zulm jo jallad hue mahshar men
khud gavahi ke liye sab ki jafaen aaiin
mujrmon hi ko nahin zulm ka farman aaya
be-gunahon ko bhi likh likh ke sazaen aaiin
us ka divana huun samjhati hain pariyan mujh ko
sar phirane ko kahan se ye balaen aaiin
tire bande hue ki jin se lagavat tu ne
ai pari-ru tujhe kyunkar ye adaen aaiin
hashr mauquf kiya josh men rahmat aai
zaar naale ki jo har su se sadaen aaiin
lashkar-e-gul jo gulistan men khizan par umda
saath dene ko pahadon se ghataen aaiin
meri turbat pe kabhi dhuup na aane paae
shaam tak subh se ghir ghir ke ghataen aaiin
munh chhupane lage maashuq javan ho ho kar
nek-o-bad ki samajh aai to hayaen aaiin
khaak udane jo saba aai miri turbat par
sar patakti hui rone ko ghataen aaiin
bakhsh di us ne mire baad jo poshak miri
qais o farhad ke hisson men qabaen aaiin
rahaten samjhe hasinon ne jo i.zaen diin
pyaar aaya to pasand un ki jafaen aaiin
aa gaya rahm use diin sab ki muraden us ne
ajizon ki jo sifarish ko duaen aaiin
mere sahra ki ziyarat ko hazaron pariyan
roz le le ke sulaiman ko razaen aaiin
ai ‘sharaf’ husn-paraston ko bula ke luuta
in hasinon ke dilon men jo daghaen aaiin
Leave a Reply