vo miri duniya ka malik tha magar mera na tha
main ne is andaz par pahle kabhi socha na tha
ek muddat tak raha ḳhush-fahmiyon men mubtala
a.ine ke ru-ba-ru jab tak mira chehra na tha
tohmaton ko ek aise ajnabi ki thi talash
jo kabhi ghar se nikal kar raah men Thahra na tha
ho chuki thi shohraten rusva.iyon se ham-kanar
bhuul jaata main jise vo saneha aisa na tha
meri nazron men hai ḳhaka vo bhi husn-e-dost ka
jis ko logon ne abhi tak zehn men socha na tha
main uThun to rang laa.en tazkaron ke silsile
log itna to kahen ki aadmi achchha na tha
log is andaz men dete hain duniya ki misal
main to jaise tajrabon ke daur se guzra na tha
ik naya ehsas dete hain vo ahl-e-sang ko
aabru ke saath rahna shahr men achchha na tha
kya asar-andaz hota us pe afsana ‘nazar’
lafz bhi mange hue mafhum bhi apna na tha
Leave a Reply