zaban ka zaviya lafzon ki ḳhu samajhta hai
main us ko aap pukarun vo tu samajhta hai
main us ki bazm men bhi sarfaraz rahta huun
mera nasab miri azmat adu samajhta hai
munafiqat se azizon ko zer karta hai
aur us men apni baḌi aabru samajhta hai
suḳhan ke harf pe rakhta hai harf-e-jan ka madar
haya ko aankh ki durd-e-subu samajhta hai
rafugaran mire zaḳhm-e-ana se aajiz hain
ki mere ḳhuun ki tezi rafu samajhta hai
Leave a Reply