Ataul Hasan
fursat-e-hijr men kuchh kar-e-tamasha hi sahi
tu nahin mujh ko mayassar to ye duniya hi sahi
main kisi rahm-o-karam par to nahin teri tarah
ziist ki raah pe ab chahe main tanha hi sahi
qarya-e-ghair men alfaz ka dam ghaTta hai
fart-e-iz.har ke pal apna ilaqa hi sahi
pahle baḌh-chaḌh ke mohabbat men kiya vaqt basar
ab zabun-hali-e-jazbat men itna hi sahi
jaane vaale tu koi ik to bharam rahne de
kuchh na kuchh dil ke liye hasil-e-rafta hi sahi
sarsari ranj pe banta hai hasan zabt magar
is bahane se chalo varzish-e-girya hi sahi
Leave a Reply