mujh se mukhlis tha na vaqif mire jazbat se tha
us ka rishta to faqat apne mafadat se tha
ab jo bichhda hai to kya roen judai pe tiri
yahi andesha hamen pahli mulaqat se tha
dil ke bujhne ka havaon se gila kya karna
ye diya nazaa ke aalam men to kal raat se tha
markaz-e-shahr men rahne pe musir thi khilqat
aur main vabasta tire dil ke mazafat se tha
main kharabon ka makin aur taalluq mera
tere naate kabhi khvabon ke mahallat se tha
lab-kushai pe khula us ke sukhan se iflas
kitna arasta vo atlas-o-banat se tha
Leave a Reply