Munawwar Rana
ham kuchh aise tire didar men kho jaate hain
jaise bachche bhare bazar men kho jaate hain
mustaqil jujhana yadon se bahut mushkil hai
rafta rafta sabhi ghar-bar men kho jaate hain
itna sanson ki rifaqat pe bharosa na karo
sab ke sab mitti ke ambar men kho jaate hain
meri khuddari ne ehsan kiya hai mujh par
varna jo jaate hain darbar men kho jaate hain
dhundhne roz nikalte hain masail ham ko
roz ham surkhi-e-akhbar men kho jaate hain
kya qayamat hai ki sahraon ke rahne vaale
apne ghar ke dar-o-divar men kho jaate hain
kaun phir aise men tanqid karega tujh par
sab tire jubba-o-dastar men kho jaate hain
Leave a Reply