Dekhne Walon Ne Kuchh Dekha Bhi Hai

dekhne vāloñ ne kuchh dekhā bhī hai

chashm-e-nargis dīda-e-bīnā bhī hai

in dinoñ aalam hai kuchh dil kā ajab

hashr bhī barpā hai sannāTā bhī hai

ik hujūm-e-dostāñ hai aur maiñ

dahr meñ mujh sā koī tanhā bhī hai

har taraf ta.amīr dīvāreñ huiiñ

sochtā ye huuñ kahīñ saayā bhī hai

kyuuñ na ho fikr-o-ḳhayāl-e-tishnagāñ

band mujh meñ pyaas kā dariyā bhī hai

bhuul jā.egā zamāna kyā hameñ

ham ne jo dekhā hai vo likkhā bhī hai

vo bhī ‘nashtar’ ho ga.e haiñ ajnabī

vo ki jin se dard kā rishta bhī hai

Leave a Comment