Aap Apni Bewafai Dekhiye

aap apni bevafai dekhiye

ham se aur aisi burai dekhiye

baat phir ham se banai dekhiye

phir vahi taqrir aai dekhiye

aaina us but ko dikhla kar kaha

aur surat haath aai dekhiye

arsh ki zanjir par turra hua

nala-e-dil ki rasai dekhiye

ham asiran-e-tilism-e-khak hain

kya hua vaqt-e-rihai dekhiye

maar Daala munh chhupa kar aap ne

maut kis parde men aai dekhiye

aamad aamad mausam-e-gul ki hue

phir tabiat gud-gudai dekhiye

dagh-e-dil taara hai chashm-e-mehr ka

ishq ki jalva-numai dekhiye

meri janib yuun nazar karna na tha

aap ne bijli girai dekhiye

phenkiye hathon se phulon ki chhadi

meri gul-khurda kalai dekhiye

chashm-poshi is qadar achchhi nahin

ab to jaan ankhon men aai dekhiye

ek din ro ro ke tufan laenge

is qadar na-ashnai dekhiye

vaah re surma lagana aap ka

shakh-e-nargis hai salai dekhiye

saaf hai aina-e-askandari

is miri dil ki safai dekhiye

der hoti hai hamari qatl men

ye nahin achchhi jhukai dekhiye

laiye pilvaiye jam-e-sharab

dekhiye badle vo aai dekhiye

mar gae lekin na raz-e-dil khula

aah bhi lab tak na aai dekhiye

vo na aana tha na aae ai ‘saba’

rafta rafta maut aai dekhiye

Leave a Comment