Shahnawaz Ansari
teri parchha.i ko ab dhuup dikhani hai mujhe
is liye ḳhvab ki divar girani hai mujhe
hasraton ka abhi loban sulag jaa.e zara
phir dhuen par teri tasvir banani hai mujhe
dhime lahje men bahut chiḳh liya hai main ne
ab to avaz ki raftar baḌhani hai mujhe
jo muqaddar men likha hai vo mayassar hai magar
aḳhiri baar vo zanjir hilani hai mujhe
kaash is baar main dariyaon se zinda lauTun
kyunki ye ḳhaak to miTTi men dabani hai mujhe
jis ka kirdar hai dar-asl kahani meri
ab to darkar vahi asal kahani hai mujhe
Leave a Reply