qarz ki mohlat guzar ga.i hai
bhaa.i muddat guzar ga.i hai
vasl ke da.avedar kaho kya
hijr ki iddat guzar ga.i hai
ham to aise rone lage hain
jaise mohabbat guzar ga.i hai
dasht-e-junun! majnun ke gham men
kya be-vahshat guzar ga.i hai
ishq se be-parva logon ki
umr salamat guzar ga.i hai
ai kuffar-e-tishna-badnan
shab-e-jahalat guzar ga.i hai
ghuur andhere men parchha.in
kar ke harakat guzar ga.i hai
dil se hasrat ka jaana tha
aankh se hairat guzar ga.i hai
‘shafaq’! mahurat ke chakkar men
sa.at-e-hijrat guzar ga.i hai
Leave a Reply